திருமா அரசியல்

இலங்கை சென்று திரும்பிய விசிக தலைவர் திருமா முதல்வரைச் சந்தித்திருந்தார். அதைத்தொடர்ந்து செய்தியாளர்களைச் சந்தித்தார். தமிழகத்தில் தடய அறிவியல் பல்கலைக் கழகம் தொடங்குவதற்காக முதல்வருக்கு நன்றி தெரிவித்ததாகக் கூறினார். தமிழகத்தில் தடய அறிவியல் பல்கலைக் கழகம் தொடங்க வேண்டும் என்பது திருமாவின் லட்சியம்.

அவர் தடய அறிவியல் துறையில் பணியாற்றியவர். என்பது மட்டும் இதற்குக் காரணம் இல்லை. சாதி தொடர்பான வன்முறை வழக்குகளில் நியாயமான, அறிவியல் பூர்வமான விசாரணைகளுக்கான தேவை இருக்கிறது. தடய அறிவியல் இதில் முக்கிய பங்காற்றுகிறது. பாரபட்சமற்ற ஆதாரங்களை வழங்கவும், வழக்குகளில் தாமதங்களைத் தவிர்க்கவும் , சாதி தொடர்பான வழக்குகளில், குற்றவாளிகளை நீதியின் முன் நிறுத்தப்படுவும், தடய அறிவியலின் பணி முக்கியமானது.

அதிகரித்து வரும் குற்ற விகிதங்கள், நவீன குற்றங்களின் சிக்கலான தன்மை, இவற்றின் காரணமாக நமக்கு திறமையான தடயவியல் நிபுணர்கள் தேவைப்படுகிறார்கள். இதன் பொருட்டுதான் திருமா தடய அறிவியல் பல்கலைக் கழக உருவாக்கத்தில் அக்கறை கொள்கிறார்.

அடுத்ததாக அவர் முதல்வரிடம் வைத்திருக்கும் கோரிக்கை முக்கியமானது. கடந்த ஆண்டு இலங்கையின் ஜனாதிபதியாகத் தேர்ந்தெடுக்கப்பட்ட அனுரகுமார திசாநாயக்க இலங்கை அரசியல் அமைப்புச் சட்டத்தில் மாற்றங்களைச் செய்யத் திட்டமிட்டுள்ளார்.

இந்தியாவில் நிலவுவதுபோல் ‘மாநிலத்தில் சுயாட்சி, மத்தியில் கூட்டாட்சி’ எனும் நிலையை இலங்கையிலும் கொண்டுவர இந்திய அரசு அழுத்தம் தர வேண்டும். அதற்கு நாம் ஒன்றிய அரசை வலியுறுத்த வேண்டும். என முதல்வரிடம் கூறியதாக திருமா கூறியிருந்தார். இதுதான் திருமாவின் தனித்தன்மை.

சமீபத்தில் களம் புதிது அவருக்கு தமிழ்ப் பேராளுமை விருது வழங்கியிருந்தது. இது தேர்தல் காலம். எல்லா கட்சிகளும் தேர்தலை ஒட்டி ஆயிரம் கணக்குகள், ஆயிரம் காய் நகர்த்தல்களைச் செய்கின்றன. ஆனால் திருமா தேர்தல் அரசியலை மட்டுமே கவனத்தில் கொள்கிற தலைவர் அல்லர். இது மாவீரர்களைக் கொண்டாடுகிற மாதம். இம்மாதத்தில் அவர் இலங்கை சென்று வந்தார். தேர்தல் அரசியலுக்குச் சம்பந்தம் இல்லாத, ஈழத் தமிழர் அரசியலில் , நடைமுறை மாற்றங்களைச் சிந்திக்கிற தலைவராக அவர் திகழ்கிறார்.

இலங்கை அரசியல் அமைப்பின் 13 வது சட்டத் திருத்தம் முக்கியமானது. ராஜிவ் ஜெயவர்த்தனா இடையிலான ஒப்பந்தத்தால் உருவானது. தமிழர்களுக்கு அதிகாரம் அளிக்கும் அச்சட்டத்திருத்தம் போதுமானதல்ல எனக் கருதிய எல்டிடி அமைப்பு அதை ஏற்கவில்லை. தமிழர்களுக்கு அது அதிகம், எனக் கருதிய சிங்களவர்களும் அத்திருத்தத்தை ஏற்கவில்லை. பிறகு நிகழ்ந்த அரசியல் மாற்றங்கள், 13 வது சட்டத் திருத்தத்தைத் தக்க வைத்துக் கொண்டாலே போதும், என தமிழ் அரசியல் அமைப்புகளை எண்ண வைத்தது.

பொருளாதார நெருக்கடிக்குப் பிறகு, மீண்டும் நவீன இலங்கையைக் கட்டியெழுப்ப அனுரகுமார திசாநாயக்க முயற்சிக்கிறார். அதில் ஒரு நடவடிக்கைதான் அரசியலமைப்பு சீர்திருத்தத்தம்.

ஹார்வர்ட் பல்கலையில் சட்டம் படித்தவர், அரசியலமைப்பு அறிஞர் டாக்டர் நீலன் திருச்செல்வம். அவரால் ஆகஸ்ட் 3 ஆம் தேதி வடிவமைக்கப்பட்ட மாற்றங்கள், நாட்டின் பிராந்திய ஒருமைப்பாட்டைப் பேணும் வகையிலும், இலங்கை இன மோதலின், மூல காரணங்களை நிவர்த்தி செய்யக் கூடியதாகவும், அதிகாரப் பகிர்வுக்கான விரிவான கட்டமைப்பை வழங்கியிருப்பதாகவும் கூறுகிறார்கள்.

சிங்களர்களும் இலங்கை அரசியல் அமைப்புச் சட்டத்தில் சீர்திருத்தம் தேவை, என விரும்புகிறார்கள். அதேவேளை அவர்கள் விரும்புகிற சீர்திருத்தத்துக்கும் தமிழர் விரும்புகிற மாற்றங்களுக்கும் இடைவெளி உள்ளது. திசாநாயக்க அரசு உருவான பிறகும் தமிழர்களால் தாம் இழந்த காணிகளைப் பெற முடியவில்லை. தமிழ்ப் பகுதிகளில் குடியமர்த்தப்பட்ட சிங்களர்கள் மீள அழைக்கப்படவில்லை.

சிங்களவர்கள் விரும்புகிற அரசியலமைப்பு மாற்றம் தமிழர்கள் சிங்களர்களுக்கிடையேயான சமஷ்டி அரசியல் அமைப்பு அல்ல. அவர்கள் விரும்புவது ஊழலற்ற, அதிகாரம் குறைக்கப்பட்ட (abolish the Executive Presidency), அதிகாரத்தில் அமர்ந்திருப்பவர்களை, மீள அழைக்கத் தக்க வகையிலான மாற்றங்கள்.

கடந்த தேர்தலில் அனுரகுமார திசாநாயக்கவின் வெற்றிக்கு தமிழர்களின் ஆதரவும் முக்கிய காரணம். தேர்தல் பிரச்சாரத்தில், ‘ஜனநாயகத்தை வலுப்படுத்துவதையும், அனைத்து குடிமக்களின் சமத்துவத்தை உறுதி செய்வதையும் நோக்கமாகக் கொண்ட ஒரு புதிய அரசியலமைப்பை அறிமுகப்படுத்துவதாக’ திசாநாயக்க உறுதியளித்திருந்தார். அதை அவர் செய்வாரா? எனக் காத்திருந்தால் மட்டும் போதாது. இந்தியா அதற்குரிய அழுத்தத்தைத் தர வேண்டும். இதைதான் திருமா முதல்வரிடம் பகிர்ந்திருக்கிறார்.

தன் கட்சிக்காக ஐந்து சீட்டு பத்து சீட்டு பேரம் பேசுகிற சராசரித் தலைவர் அல்லர் அவர். ஈழத்தமிழரின் உரிமைகளைப் பேசுகிற தலைவராக உயர்ந்து நிற்கிறார் திருமா.